تذکرہ بابا تاج الدین اولیاء

بشارت  تاج الاولیاء حضرت بابا تاج الدین ناگپوری  کی والدہ ماجدہ نے بابا صاحب کی   پیدائش سے قبل ایک خواب دیکھا   ...  جس میں آپ کی  ولادت کی بشارت دی گئی تھی - انہوں نے دیکھا کہ  تا حد نظر ایک وسیع و بسیط میدان ہے  ... اس میدان میں ہزاروں شہر آباد ہیں اور مخلوق خدا بے حد و بے حساب  ہے  ...  جس میں ہر مذہب و ملت کے لوگ آباد ہیں -  سردی کا موسم ہے  ،  چاند کی چودھویں تاریخ ہے اور چاند خوب چمک رہا ہے -   حضرت تاج الاولیاء کی والدہ ماجدہ نے دیکھا کہ چاند آسمان سے ٹوٹا اور ان کی گود میں اتر آیا -

  متصرف فی الوجود  حضرت بابا سید محمّد تاج الدین حسنی و الحسینی ناگپوری رحمتہ الله علیہ  اواخر بارہویں صدی ہجری میں منصُہ شہود پر آئے - کسی کا قلم  کیونکر ان کے اوصاف  بیان کرسکتا ہے -  سکر و صحو  ،  جذب و سلوک کی کیفیات آپ پر یکساں طاری رہتی تھیں   ... اس لئے جمع کردہ  حالات  میں بعض حضرات نے اپنے تجربات اس طرح   بیان کئے گویا آپ حالت سکر میں ہیں - حضرت با یزید بسطامؒی اور شیخ عبدالقادر  جیلانی محبوب سبحانیؒ  کی طرح آپ بھی متصرف فی الوجود   ہیں  ... جیسا کہ جمع کردہ شواہد سے  معلوم ہوتا ہے - جس پر حقیقت کھلی اس نے دور رہ کر بھی بابا صاحب سے فیض حاصل کیا اور جو محجوب رہا وہ نزدیک رہ کر بھی محروم رہا  ... جیسا کہ  بہت سے حضرات آج بھی آپ کو مجذوب سمجھتے ہیں  ... وہ محروم رہتے ہیں  ،  حالانکہ آپ جس بے خودی کے مقام پر فائز تھے  ... اس  بے خودی کا حال مولانا رومی نے کچھ اس طرح بیان فرمایا ہے  ...  من شدم عریاں ز تن او از خیال  می    خ...